Баян-Өлгий аймгийн хэсэг иргэд аймгийнхаа Засаг дарга С.Хабалыг огцрохыг шаардсан тэмцлээ 21 дэхь өдрөө үргэлжлүүлж байна. Аймгийн  төв талбайд 20 орчим хүн суулт хийгээд байгаа ба тэднийг дэмжигчдийн тоо өдрөөс өдөрт нэмэгдсээр байгаа аж. Өчигдрийн байдлаар 1200 орчим хүн огцор гэх шаардлагыг дэмжиж буйгаа илэрхийлж гарынхаа үсгийг зурсан байна. Гэвч тэдний тэмцэл аймгийн цагдаагийн хэлтсийн алба хаагчдын эсэргүүцэлтэй тулгарчээ. Цагдаа, иргэд болоод АН,МАХН хоёр намын гишүүд гээд олон талын хоорондын мөргөлдөөнөөс гурван хүн бэртэж, гэмтжээ. Мөн цагдаагийн алба хаагчийн өөдөөс эсэргүүцэл үзүүлсэн, биед халдсан хэргээр арав гаруй хүнийг баривчлан түр саатууллаа гэсэн мэдээлэл байна. Тиймээс эсэргүүцлийн цуглааныг зохион байгуулж буй хэсэг нөхөд Баян-Өлгий аймагт үүсээд буй тэмцэл ширүүсч байгаа учраас эл асуудлыг ойрын хугацаанд шийдэж өгөөч гэсэн хүсэлтийг Монгол Улсын Ерөнхий сайдын нэр дээр илгээсэн байна. Алгуурлавал хүний амь эрсдэж болзошгүйг ч тэд дурджээ.

У.Шагай