Нийгмийн арай дөнгүүр хэсэг нь элдэв балай мөнгө тарааж, худлаа амлаж эх орныхоо эдийн засгийг хорлохгүй гэж итгэж байлаа. Намуудын амлалтыг сонгуулийн шинэ хуулиар нэг юм зогсоолоо. Гэвч сурсан юмыг сураар боож болдоггүй гэгчээр сонгууль эхлэхээс сарын өмнө төр нь тодруулбал Засгийн газар нь мөнгө амлаад ядуу зүдүү, тахир дутуу, өндөр настан, хөгжлийн бэрхшээлтэй иргэд, хөгшид хүүхдээр тохуурхав. 

Нийгмийн халамжийн сангаас олгож байгаа зарим тэтгэмж, ахмад настан, хөгжлийн бэрхшээлтэй иргэнд үзүүлэх тусламж, хөнгөлөлтийн хэмжээ, протез, ортопед болон тусгай хэрэгслийн жишиг үнийн жагсаалтыг Засгийн газрын хуралдаанаар хэлэлцэн баталж долдугаар сарын 01-нээс дагаж мөрдөхөөр шийдвэрлэжээ.



Засгийн газрын хуралдааны амлалтыг жагсаавал

  • Байнгын асаргаа шаардлагатай 16 хүртэлх насны хүүхдэд сард нэг удаа олгох мөнгөн тэтгэмж, байнгын асаргаа шаардлагатай 16 ба түүнээс дээш насны иргэнд улиралд нэг удаа олгох мөнгөн тэтгэмжийг тус бүр 60 мянган төгрөг
  • Гурав ба түүнээс дээш тооны 14 хүртэлх насны хүүхэдтэй, өрх толгойлсон эх /эцэг/-т жилд нэг удаа 120 мянган төгрөг
  • Ихэр хүүхэд төрүүлж, эсэн мэнд өсгөж байгаа өрх, иргэнд олгох нэг удаагийн мөнгөн тэтгэмжийн хэмжээг дөрөв хүртэл насны хоёр ихэр бол хүүхэд бүрт нэг сая, гурав ба түүнээс дээш ихэр бол хүүхэд тус бүрт таван сая төгрөг
  • Гэнэтийн аюул, осол, урьдчилан төсөөлөх боломжгүй бусад шалтгаанаар гэр оронгүй, гэр орон нь цаашид амьдрах боломжгүй болсон, амьжиргааны эх үүсвэрээ алдсан өрх, хорих ангиас суллагдсан гэр оронгүй иргэн, гэр оронгүй тэнэмэл өрх, иргэн, 18 нас хүрээгүй байхдаа бүтэн өнчин болсон 18-24 насны иргэнд гэр авахад нь зориулж нэг удаа олгох мөнгөн тэтгэмжийг 1.5 сая төгрөг
  • Орон сууцны хөлс болон түлшний үнийн хөнгөлөлтөд жилд нэг удаа олгох мөнгөн тусламжийн хэмжээг 200 мянган төгрөг
  • Ахмад дайчин, дайнд оролцож яваад амь үрэгдсэн иргэний эхнэр /нөхөр/-т сар бүр олгох мөнгөн тусламжийн хэмжээг 200 мянган төгрөг
  • Төрийн шагналт, төрийн соёрхолт, түүнээс Улсын ударник, Хувьсгалт тэмцлийн ахмад зүтгэлтэнд сар бүр олгох мөнгөн тусламжийн хэмжээг 150 мянган төгрөг
  • Насанд хүрсэн, бүрэн хараагүй иргэний харилцаа, холбооны зардалд сар бүр үзүүлэх хөнгөлөлтийн хэмжээг 20 мянган төгрөг
  • Нийслэл хот, суурин газарт нийтийн тээврийн хэрэгслээр хөгжлийн бэрхшээлтэй хүүхдийг бүх шатны сургалтын байгууллагад хүргэж өгч, авдаг асран хамгаалагч, харгалзан дэмжигч нэг хүнд олгох унааны зардлын хөнгөлөлтийн хэмжээг жилд нэг удаа 200 мянган төгрөг байхаар тогтлоо.
Өнөө тарааж буй оюутны 70, эх орны хишиг 21 мянган төгрөг,  хуучны амлалтын үлдэгдэл гурав тасалсан 330 мянга дээр нэмээд дахиад баахан нийгмийн халамжийн нэмэгдэл гараад ирлээ. Засгийн газар бас их нохойтож байна. Дээрх амлалтын мөнгийг долдугаар сарын 1-нээс өгнө гээд бүдэгхэн бичиж сулхан дуугарлаа. Долдугаар сарын 1-нд энэ Засгийн газар байгаа ч уу, үгүй ч үү. Байлаа гэхэд дараагийн парламент төсвийн тодотголоороо энэ их мөнгийг дэмжээ ч үү, үгүй ч үү. Долдугаар сарын 1-нээс мөрдөгдөнө гээд бүдэгхэн бичигдсэнийг энэ Засгийн газар нохойтож байгааг хөгжлийн бэрхшээлтэй иргэд битгий хэл эрүүл хэсэг нь ойлгохгүй. Дахин хэлэхэд дээрх тэтгэмжид зарцуулагдах мөнгө нь энэ оны Засгийн газрын зарцуулах ёстой төсөвт огтхон ч суугаагүй бөгөөд суулгахын тулд шинээр төсвийн тодотгол хийх хуультай.  Дээрх тэтгэмжүүдэд хамрагдах 120 мянган иргэдийн саналыг цуглуулахын тулд толинд мөнгө тусган үзүүлж байна. Хөгжлийн бэрхшээлтэй иргэд эмзэг бүлгийнхэн голдуу баярлаж одоо байгаа Засгийн газартаа илүү хайртай болж МАН-д саналаа өгнө гэсэн нарийн тооцоо боджээ. Төрийн албан хаагчийн цалинг сард мянган ногоон болгоно. Дээр нь төрийн амласан мөнгийг ядуу хэсгийнхэн хүртэх юм гэнэ дээ.

Зургийг Л.Хадбаатар