Ерөнхий сайд Г.Занданшатар ажлын гараагаа эхэлж, улс орны хэмжээнд хамгийн халуун цэг болоод буй Эрчим хүчний яаманд ажиллаж, удирдлагуудтай нь уулзаж, хугацаатай, хатуу үүрэг өглөө. Энэ үеэр тэрбээр Засгийн газрын тогтоолоор зургаан сарын хугацаанд “Дулааны гуравдугаар цахилгаан станц” ТӨХК-д онцгой дэглэм, төрийн өмчит бусад цахилгаан станцуудад өндөржүүлсэн бэлэн байдал зарлаж шууд хяналт тогтоосноо танилцуулав.

Үүний дагуу дулаан цахилгаан станцуудын техник, тоног төхөөрөмж, тоноглол, системийн горимын хэвийн үйл ажиллагааг хангах, төлөвлөгөөт засварыг хуваарийн дагуу хийж буй эсэхэд байнгын, хатуу хяналт тавих, цаашид үүсэж болзошгүй эрсдлээс урьдчилан сэргийлж ирэх оны өвөлжилтийн бэлтгэлийг төлөвлөсн хугацаанд хийж гүйцэтгэхийг салбарын сайдад үүрэг болголоо.

Хэдийгээр “ДЦС-3” ТӨХК-д осол гарч албан үүргээ гүйцэтгэж байсан инженер нь ажилтнуудаа аварч амиа алдсан хар өдрүүд “үүрэг гүйцэтгэгч” Засгийн газрын үед таарсан боловч яаралтай арга хэмжээ авах ёстой шалтгаан нөхцлүүд бий болчхоод эртнээс түгшүүр зарлаад байсан нь хэдийнэ илчлэгдсэн. Тухайн үеийн Засгийн газар алдаагаа зассан ч оройтсон нь маргашгүй үнэн билээ.

Тиймээс шинэ Ерөнхий сайд юуны өмнө тус салбарт засаглалын хямрал нүүрлэсэн, удирдлага, зохион байгуулалт, менежментийн хувьд төдийгүй төрийн албаны чиг үүргийн давхцлаас болж нөхцөл байдал хүндэрсний улмаас олон жилийн туршлагатай инженер, техникийн ажилтнууд, Үйлдвэрчний эвлэл, мэргэжлийн хүмүүсийн зүгээс эсэргүүцлийн бичиг ирсээр байгааг анхааруулав.

Энэ үеэр тэрбээр “Наад зах нь ОХУ-аас эрчим хүч импортолсны төлбөр тооцоо болох 190 орчим сая ам.долларыг шилжүүлэхгүй удсанаас болж эрчим хүч нийлүүлэхээс татгалзсан тухай албан бичиг тавдугаар сарын 1-нд ирсэн. Хаанаас, хэн төлөх нь мэдэгдэхгүй эмх замбараагүй байдал үүссэний улмаас Засгийн газрын хуралдаанаар яаралтай хэлэлцэн шийдвэрлэсэн” болохыг дурьдаж хатуу шүүмжилсэн юм.

Үүнтэй холбоотой нөхцөл байдлын тухайд, эдүгээ Эрчим хүчний сайд Б.Чойжилсүрэн, Эрчим хүчний хороог толгойлдог, Шадар сайд Т.Доржханд, тус салбарын төрийн өмчит компаниудыг нэгтгээд буй “Эрчист Монгол” ХХК, батерей хураагуур зэрэг зарим төслийн улмаас эрчим хүчний салбарт оролцоотой ажиллаж буй нийслэл гэхчлэн дөрвөн толгойтой болчихоод байгаа билээ. Тиймээс юуны өмнө энэ замбараагүй байдлыг эмхэлж, дөрвөн толгойг нэг толгойтой болгон цэгцлээд Засгийн газрын хуралдаанаар яаралтай оруулж ирэхийг салбарын сайдад даалгав.

Осол гарснаас хойш арваад хонож байхад ослын нөхцөл байдал, хохирлын хэмжээ тогтоогдоогүй байна. Учир нь УЕПГ-аас уг хэргийн харьяаллыг өөрчилснөөр уг хэрэгт холбогдох хоёр хавтас, 292 хуудас материал энэ сарын 10-ны өдөр, эд мөрийн баримтууд 13-ны өдөр УМБГ-ын Онц хүнд гэмт хэрэгтэй тэмцэх газарт шилжүүлсэн байдаг. Хэргийн газрын үзлэгээр хураан авсан цахилгааны утас, хөрсний дээж дээр Гамшиг судлалын хүрээлэнгийн шинжээч томилж, Хүнд гэмт хэрэг мөрдөн шалгах хэлтсийн даргаар ахлуулсан долоон алба хаагчийн бүрэлдэхүүнтэй ажлын хэсэг томилон ажиллаж буй билээ. Мөн ЭХЯ-ны мэргэжилтнүүдийг оролцуулан тухайн моторыг зогсоох үеийн аюулгүй ажиллагааны зааварчилгаа мөрдсөн эсэх дүгнэлт гаргуулахаар болсон.

Уг дүгнэлтэд үндэслэн хөндлөнгийн байгууллагаас бүрэлдэхүүнтэй шинжээч томилж, хөдөлмөрийн аюулгүй байдлын дүрэм зөрчигдсөн эсэх талаар, үүнээс тусдаа хохирлын хэмжээ тогтоох үнэлгээ гаргуулахаар үнэлгээний байгууллагуудын санал авах зэрэг ажиллагаа хийж буй юм. Тус станцын хэвийн байдлыг үргэлжлүүлэх, сэргээн засварлахын тулд турбиныг засах хэрэгтэй, засахын тулд задлах хэрэгтэй. Энэ бүхэн ослын дүгнэлт хэзээ гарахаас шалтгаалах учраас удаашраад байгаа нь хүндрэл үүсгээд байна.

Иймд Ерөнхий сайдын зүгээс ослын шалтгаан, хохирлын хэмжээг тогтоох, цаашид эрсдлээс сэргийлэх талаар чанд хяналт шалгалт хийж, аль болох богино хугацаанд дүгнэлт гаргах, хамгийн гол нь энэ салбарт байнгын хяналт шалгалт тавьж цаашид эрсдэл гарахгүй байхыг чухалчлан даалгалаа. Мөн чиг үүргийн давхардлыг арилгаж, засаглалын хямралаас гарах, үүсээд буй хүндрэл, тулгамдсан асуудлаа ний нуугүй дэлгэн, хамгийн чин үнэн байдлаар Засгийн газрын хуралдаанд, яаралтайгаар танилцуулахыг салбарын сайд үүрэг болгож, онцгой байдал, өндөржүүлсэн бэлэн байдлын заалтуудыг хатуу мөрдөж ажиллахыг анхаарууллаа.

2025.06.19.

Ерөнхий сайд халуун цэгээс нь, “аваараа асааж” ажлаа эхэллээ

Сэтгэгдэл (0)