Удо Б. Баркманн


Зүүн Германы монгол судлалыг

үндэслэн байгуулагч Паул Рачневскийг

эргэн дурсахуй1

Хоёр Германыг нэгтгэх үйл явц хэрэг дээрээ тун удаашралтай, хуучин БНАГУ-ын олон иргэд, ялангуяа сэхээтнүүдийн хувьд ихээхэн зовиуртай болж өнгөрсөн билээ. Уг үйл явдал нь бид чинь ингэхэд хаанаас ирчихэв ээ, түүх хэрхэн өрнөж байна, энэ түүхэнд хувь хүн ямар үүрэгтэй байв гэдэг асуултыг өөрсөддөө байн байн тавих болгов. Ялангуяа түүхийг шахан зайлуулах, зориуд мушгин гуйвуулж харуулах, мөн л урьдынх шигээ хүчээр тулган хүлээлгэх нь улам ихэсч байх шиг санагдах болсон өнөө үед бүр ч тийм хэвээрээ байна. Түүхийг ингэж үзэх нь асар том алдаа дутагдалд хүргэдэг агаад ихэвчлэн хоёр нүүртэй байдаг ямар нэг “диктатур”-тай түүхийг холбож, тэр нь яаж үйлчилэв ээ гэдэг дээр төвлөрүүлэх нь өөрөө өөрсдийгөө үлэмжхэн гүтгэж, гутаан доромжлоно гэсэн үг юм. Зүүн германчуудын хувьд түүх гэж байгаагүй юм шиг, тийм нөхцөл байдалд дахин орчихоод байна.