Араншин олон янз. Сайхан муухай аашнаас хүний хорвоо бүрддэг. Зөөлөн энэрэнгүй араншин, мунхаг тэнэг араншин гээд тоолбол олон. Сэтгэл зүйчид араншинг ерөнхийд нь дөрөв хувааж бүдүүвчилдэг.

Монголчууд бид дөнгөж гурван сая хүрлээ. Хятад, Энэтхэг, Америк, Бразил, Индонез, Орос зэрэг 1,3 тэрбумаас 150 сая хүн амтай аварга гүрнүүдийн дэргэд 3-хан сая хүнтэй Монгол дэндүү жоохон.

Оросууд хорвоогийн хамгийн тэнэг үндэстнээр чукчаг “өргөмжилж” инээдмийн бай болгож доромжилдог. Харин өнөө үеийн КВН-чүүдийн хувьд тэнэгийн оргил нь чукча бус монголчууд болжээ.

Өнгөрсөн зууны харанхуй бүдүүлэг Монголын балчир хүү Сүх улс төрийн туршлагагүйдээ гэнэдэж Бодоог хөнөөх улаан оросын хуйвалдаанд санамсаргүй урхидуулсан бүдэг ул мөр буйг зарим түүхчид шивэгнэх болов. Феодализмын үед байтугай социализмын үед ч манай удирдагчид хууртаж байлаа.

Маний үед эх оронч үзлийг Зөвлөлтөд үнэнч, Хятадыг үзэн ядах хоёрхон хатуу хэмжүүрээр оношилж байв. Энэ хоёр шалгуурын болзлыг хангах гэж эдүгээ хойш харж бялдуучлаад, урагш харж омогддог кадрууд тасрахгүй нь гээч.

Ю.Цэдэнбалыг огцруулсанд гомдоод явдаг хүмүүс бий. Намын хянан шалгах хороо гэгч аймшигт газрын орлогч, Цэдэнбалын нутгийн Н.Цэрэнгийн ярилцлага (“Өдрийн сонин” 2015-03-17,18) хоёр орны харилцаанд ямар өгөөжтэйг бүү мэд. Гэхдээ оросууд тоох ч үгүй биз.