Төрийн ордны өмнө нэг бага зэрэг таргадуулсан байж мэдэх Чингис хааны хөшөө өөр хоёр ч хааны хамт баригдаад хэдэн жилийг ардаа үдлээ. Дахин дахин төсөв хүрэхгүй хэмээн нэмүүлсээр их хэмжээний мөнгөөр боссон хэмээн албаны бус баталгаатай бус хэвлэлийн эх үүсвэрүүдээс сонсож үзэж байлаа. Хархад сүрлэг үнэхээр Чингис хааны нутагт ийм хөшөө байлгүй яахав гэж уулга алдмаар сайхан хөшөө болсон санагддаг юм. Тэгсэн хараад байхад тэр хөшөөг бидэнд зориулж босгоогүй болтой юм аа. Улс төрчид, дарга сайд нар хааяа хэвлэлийхэнийг дагуулж очиж хэрхэн хөшөөнтэй ойрхон очиж чаддаг нэр нөлөөтэй хүн болхоо гайхуулдаг хэрэгсэл юм шиг санагдсан шүү. Энэ нь жирийн иргэдийг оруулахгүйн тулд олс татан байнгын цэргийн хамгаалалт дор байлгадаг нь тодоос тод илэрхийлж байна. Учир нь ядарсан монгол иргэд бүдүүлэг, танхай тул хайрт Чингис хааныхаа хөшөөг завааруулж хог новштой хутгаж мэдэх эрсдэлтэй болхоор тэр юм гэнэ. Гэхдээ гадаадад галуу шувууны мах идэж үзсэн хүмүүсээс гадны улсууд хөшөө дурсгалаа иргэд, жуулчидад чөлөөтэй үзүүлж, зургаа авхуулах боломжоор хангадаг тухай сонсож байлаа. Иргэд жуулчдад нээлттэй болгоод ямар ч хөдөлгөөнгүй байнга хамгаалж зогсдог цэргийн оронд харж хамгаалаад, арчиж цэвэрлээд зогсдог ажилтан байвал хаа хаанаа ялгаагүй санагдах юм.

Саяхан твитер даяар #Savegarden хөдөлгөөнийг их хурлын гишүүн Энхбат гэж хүн санаачлан төрийн ордны арын цэцэрлэгийг хамгаалах, тэнд парламентийн ордон бариулахгүй онлайн тэмцэл өрнүүлж эхэлжээ. Цэцэрлэгээ хамгаалана гэдэг зөв зүйтэй санаачлага гэвч тэр цэцэрлэгийг хэдэн жилийн өмнөөс өндөр төмөр хашаагаар хүрээлүүлж иргэд зугаалдаг сайхан цаг ард хоцорч төрийн ордонд нойр хоолоо хасан улсаа хөгжүүлж буй эрхэмүүд л зугаалдаг хэрэгсэл болгоод байгаа билээ. Шалтгаан нь бас л адилхан иргэд бүдүүлэг танхай учир тэнд бааж шээгээд архи ууна. Бас цэргүүдийн оронд цэцэрлэгч ажиллуулаад шийдэж болох л асуудал. Залуус орвол буудуулж мэдэхээр цэцэрлэгээ авархын төлөө нэгдэж байна. Бохир агаартай Улаанбаатарт цэцэрлэг чухал болхыг бүгд л мэдэж байгаа. Гэхдээ дарга нарын амьдардаг гэрт нь, ажлын өрөөнд нь орж зугаалъя гээд байгаа биш иргэд цэцэрлэгтээ зугаалж, Чингисийн хөшөөндөө зургаа татуулахыг хүсэж л байгаа. Иргэдээс хаачаад байхад дуугүй хэдэн жил болж чадсан гишүүд өнөөдөр юуны төлөө дугарч эхлэвээ.

Наадмын 2 өдөр цэнгэлдэхийн хэсэгхээн газар битүү дээвэртэй асартаа морилж баярладаг эрхмүүд задгай наранд бие засах эрх хомсхон цэнгэлдэх дүүрэн иргэдийн зовлонг ойлгох нь юу л бол. Эсвэл ингэж байж бид та бүхнээс хамаагүй илүү дээд төрөлтөн шүү гэдгээ баталж байдаг юм болвуу.

Сонгууль, хөдөлгөөн, тэмцэлийхээ үед иргэд минь хамгийн сайхан, ухаантай улс би та бүхний төлөө хэмээн цээжээ дэлддэг эрхмүүд иргэдээсээ харамлах болхоор бүдүүлэг, танхай, соёлгүй хэмээн басамжилж доромжилдог нь байх ёстой юм шиг харагддаг болоод удаж байна. Байх ёстой эрх ямбанд нь халдая гээгүй байх ёсгүй эрх ямб бий болгоод эхлэхээр хичнээн тэнэг мулгуу ч иргэд нь дотроо бодож л байгаа байх.

Дарга нарын улс: Төрийн ордны эргэн тойронд

Сэтгэгдэл (0)