Ярилцах, хэлэлцэх, зөвшилцөх, дүйцэлдэх, цэц булаалдах, маргах, хэрэлдэх, тэмцэлдэх, хонзогнох, дайсагнах гэх монгол үгс утгын эрс ялгаатай. Амьдралаас ундардаг түмэн янзын нууцыг хамтын ухаанаар тайлах явцад энэ олон ойролцоо үг үүссэн биз ээ.

“Өдрийн сонин”-ы №140-д Б.Нямаа УИХ-ын чуулганыг хаалттай хаалганы цаана хийдэг болох санал дэвшүүлжээ. Гишүүд цэнхэр дэлгэцээр нэг сая үзэгчийн өмнө хуурамч эх оронч дүрд жүжиглэдэг нь яах аргагүй үнэн. Санал нэг байна.

Эх орондоо нүүрэлсэн таатай нөхцөлийг санаатай хааж, Төр Засгийнхаа удирдагчдыг хөрш гүрэндээ матдаг өөдгүй монгол араншин гутамшигтай.

Хорвоод хосгүй монгол ухаан гэж хөөрцөглөх хүн цөөнгүй байх юм гээч. Үндэс угсаагаараа бахархалгүй яахав. Гэхдээ юун ч даруу бус юм бэ дээ. Сайн бодвол тэнэг ч юм шиг. Тэр хосгүй ухаанаас миний мунхаг тархинд тоймтой юм заяасангүй. Тиймээс надад хосгүй ухаан гээд тоочих юм алга.

Архангайн хоёр сарлагаар сайд тавьчихсан аятай Н.Батбаяр, Д.Ганхуяг хоёрыг сонин хэвлэл үгүй мөн их доромжлох юм аа. Тэр хоёрыг огцруулбал гадаадын хөрөнгө оруулалт 50 хувиар нэмэгдэхийг УИХ-ын гишүүн Ц.Нямдорж олж харснаа мэдэгдээд байхад яагаад танк хүлдгийн угсаа хоёр эсэргүүнийг зайлуулахгүй байна аа гээд гайхацгааж байна.

Элсэн цөл ангамал тал зонхилсон Монгол орон ой хөвч ургамал ногоогоор хомс. Хойд хэсэгт хэдэн сайхан гол мөрөн заяасан боловч бүгд Орхон Сэлэнгийн бэлчрээр гадагшаа урсаад алга болдог тул нутгийн бидэнд өгөөж багатай. Малын бэлчээр, тариан талбай ус чийгээр ямагт гачигдаж, гандаж, хатаж байдаг билээ.